Muqdisho(Berberatoday.com)-Guddoomiyaha Aqalka Sare ee Federaalka Soomaaliya Cabdi Xaashi, ayaa sheegay inuu aad uga xun yahay in Madaxweynaha Soomaaliya Maxamed Cabdillaahi Farmaajo aanu aqoonsanayn Golaha Sare awoodaha Dastuurku siiyey iyo inuu Guddoomiye ahaan metelo Somaliland oo ay Dadka reer Somaliland ee Muqdisho ku sugani doorteen.

Guddoomiye Cabdi Xaashi Cabdillaahi, waxa uu sheegay in Madaxweyne Farmaajo go’aansaday inaan Golaha sare Mudanayaasha ka tirsan iyo Shirguddoonkoodu ka qaybgelin Shirkaas, isla markaana waxa uu xusay in Golaha Sare ka maqan yahay Shirka Maanta ka furmay magaalada Dhuusamareeb ee Xarunta Dowlad-goboleedka Galmudug, halkaas oo ay Madaxweynaha, Raysal-wasaaraha iyo Madaxda Dowlad-goboleedyada federaalka Soomaaliya iyo Maamulka gobolka Banaadir isugu tageen, si ay xal uga gaadhaan muranka hadheeyey wakhtiga doorashada, iyadoo muddada Madaxweyne Farmaajo ku dhammaanayso 8-da bishan Febraayo ee aynu ku jirno ee 2021-ka.