|
|
Nairobi(Berberatoday.com)-Midawga Yurub, ayaa jaray 66% dhaqaalaha uu ku taageeri jiray Ciidammada Kenya ee qeybta ka ah howlgalka nabad-ilaalinta Amisom ee Soomaaliya ku sugan.
Jarista dhaqaalahaan, ayaa dhaqan galidoonta bisha Luulyo ee sannadka soo socda, iyadoo loo tixgelinayo inay Ciidammada Kenya ka baxayaan Soomaaliya.
Ciidammada Kenya, ayaa bishii Aktoober ee sannadkii 2011-kii gudaha u galay Soomaaliya si ay halkaas ugula dagaallamaan Al-Shabaab oo ay sheegeen inay khatar ku hayeen amniga gudaha Kenya.
Midowga Yurub, wuxuu maalgeliyaa inta badan Ciidammada Amisom, Booliska, mushaaraadka shaqaalaha caalamiga ah iyo kuwa maxalliga ah iyo kharashaadka ku baxa howlaha xafiisyadooda.
15-ka xubnood ee Golaha Nabadda iyo Amniga ee Midowga Afrika (AU), ayaa 11-kii May waxay kordhiyeen joogitaanka Amisom ee Soomaaliya ilaa 31-ka Diseembar.
Berberatoday.com