Wasiirka Arrimaha gudaha oo sheegay inay xidheen Dad doonayey inay Madax-dhaqameednimo isku Caleemo-saaraan

Hargeysa(Berberatoday.com)-Xukuumadda Somaliland, ayaa soo saartay amar ay ku joojinayso in Cuqaal ama Salaadiin cusub la Caleemo Saaro.

Sidaana waxa sheegay Wasiirka Arrimaha gudaha Somaliland Cali Maxamed Waran-cadde oo Shalay hor tagey Guddida joogtada ah ee Golaha Guurtida, kuwaasi oo uu uga xog-waramay Xaaladda guud ee Dalka, sida Ammaanka, Diwaangelinta iyo Arrimo kale oo ku saabsan Abaaraha.

Wasiir Cali Waran-cadde, waxa uu sheegay inuu Digreeto ka soo saaray inaan la caleemo saarin Madax-dhaqameed cusub, “Digreeto Wasiir baan ka soo saaray inaan Suldaan iyo Caaqil dambe oo la caleemo Saarayaa aanu jiri doonin, haddaanu ahayn mid Abtirsanaya oo Aabihii ama Awowgii uga dhintay inaan la ogolaanin.” Ayuu yidhi, waxaanu intaa ku daray, “Waad maqasheen inaanu dhowr Nin oo doonayey inay isku daadiyaan (Is-caleemo Saaraan) inaanu xidhnay, qaar imika Dadka soo ururiya oo yidhaahda hala I caleemo saaro way jiraan, laakiin waanu diidnay.”