Hase-yeeshee ilo-wareedyo rasmi ah, ayaa tibaaxey in saldhigga socdaalka saaxil ee Gudoomiye Faysal Cali Waraabe uu yahay mid ku xidhiidhsan shirqool siyaasadeed oo madaxtooyada lagu falkiyey, kaasoo ku saabsan in Gudoomiye Faysal Cali Waraabe uu Xilka ka qaado Gudoomiyaha Gobolka Saaxil ee Xisbiga Ucid Marwo Rooda Axmed Yaasin, iyo sidoo kale, inuu magacaabo laba masuul kasoo jeedaa dhalasho ahaan Bariga Fog ee Gobolka Saaxil, kuwaasoo sida u dhigayo qorshaha madaxtooyadda lagu shaxeeyey noqon doona laba Xubnood oo lagu kaabo Gudoomiyaha gobolka Saaxil Marwo Rooda Axmed Yaasin, si marka ay hadasho labadan xubnood uga barbar hadlaan, una beeniyaan eedeyn maha ay xukuumadda u jeediso.

Waxa kaloo, wararku intaa ku dareen, inta uu joogo Magaalda Berbera Gudoomiye Faysal cali Waraabe, inuu soo saari doono baaq nabadeed khiyaamo ku jirto, kaasoo sida qorshuhu yahay uu ku bayaamin doono taageero uu isla barbar cid madaxtooyadda looga yeedhiyey. Waxa xogguhuu intaa ku dareen, Md. Faysal Cali Waraabe ay isku afgaran waayeen socdaalkiisan Berbera Gudoomiye Ku-xigeenka Saddexaad ee Xisbiga Ucid Muj. Cali Gurey, oo isagu sida iluhu tibaaxen socdaalka Saaxil ee Gudoomiyaha ku tilmaamay mid waqtigan loo baahneyn.