|
|
Hargeysa(Berberatoday.com)-)-Madaxweynaha Somaliland Mudane Axmed Maxamed Maxamuud (Silaanyo) ayaa lix gaadhi oo ah nooca loo yaqaano Ambulance-ka ah oo loogu tallo galay in loo isticmaalo gurmadka caafimaadka dadka abaaruhu saameeyeen ku wareejiyey guddida heer qaran ee gurmadka abaaraha.
war-saxaafadeed uu soo saaray af-hayeenka madaxtooyada Somaliland oo uu kaga warbixiyey sida deeqdan loola kala wareegay ayaa waxa uu u dhignaa sidan:-
Madaxweynaha oo halkaasi ka hadlay ayaa shacbiga ay abaartu saamaysay, Alle, uga baryey inuu ka dulqaado abaarta, raxmad khayr qabtana u shubo, waxaanu bogaadiyey hawlaha ay ilaa hadda soo qabteen guddida heer qaran ee abaaruhu iyo kuwa gobollada dalkuba.
Gaadiidkan oo ah qaybtii labaad, waxa ka horreeyey baabuur noocan oo kale ah oo dhammaa shan gaadhi kuwaasoo ay gacan ka geysatay fudaydintooda wasiirka Wasaaradda Maaliyada, Marwo Samsam Cabdi Aadan, waxaana madaxweynaha kala wareegay baabuurtaasi guddida oo uu u guddoomay sheekh Xasan Cabdisalaan oo ah guddoomiye ku xigeenka guddidaas.
Sheekha oo ka hadlay halkaas ayaa ku sifeeyey madaxweynaha dalka inuu dedaal weyn ka galay wax ka qabashada abaaraha, mahadnaqa Illaahay ka dibna u mahadnaqayo hoggaanka dalka ee heeganka u ah inay la tallaacaan wax ka qabashada abaaraha.
Berberatoday.com