|
|
Garoowe(Berberatoday.com)-Baarlamaanka Puntland oo maanta fadhi ku yeeshay magaalada Garoowe ayaa go’aan ka gaadhay nooca doorashada ee Puntland ka dhici doonta marka la gaadho sannadka 2019.
Guddoomiyaha Baarlamaanka, Axmed Cali Xaashi wuxuu u sheegay warbaahinta marka uu kulanka soo dhammaaday in doorashada ay u dhaceyso nidaamka beelaha ee lugu soo xuli jiray xildhibaannada ,wuxuuna xaqiijiyay guddiga doorashada oo maanta warbixin-siiyay Baarlamaanka inay caddeeyeen doorashada inaysan ku dhici karin nidaamka xisbiyada badan.
“Doodii maanta waxay ku soo gabagabowday in lifaaqii 3aad dastuurka ee sannadkii 2013 baarlamaankan midkii ka horreeyay ay go’aamiyeen in isagii dib loo soo cusbooneysiiyo kaas oo ahaa 8 qodob… qodobka lixaad oo ahaa in hakad la geliyo barnaamijka dimuqraadiyeynta ee hakadku galay waxaa dib u billaabaya xukuumadda cusub ee loo doortay hoggaanka Puntland sannadkii 2014 sidaas ayay yidhahdeen, qodobka ayaan ka beddelnay.”ayuu yidhi Axmed Cali , guddoomiyaha Baarlamaanka Puntland.
Go’aanka Baarlamaanka ayaa ku soo beegmaya xilli ay tagneyd wel-wel laga qabey in xukuumadda madaxweyne Cabdiweli Cali Gaas isku daydo muddo kororsi. Golaha Wakiilada ee Puntland ayaa si cad u sheegay in doorashada Madaxweynhu dhacayso maalinteedi 8 Janaayo 2019, waxaana u xaqiijiyay guddoomiyaha in baarlamaanka hadda jira uu beddalaayo baarlamaan kale oo la soo dhamaystiro ugu danbeyn 31 Diseembar,iyadoo ay sii shaqeyn doonan guddiga doorashada ee Puntland.
Berberatoday.com