Maxkamada Degmada Berbera Oo Xukun Ku Riday Afar Qof Oo Shaqaale Ka Ahaa Saldhiga Milateri Ee Berbera Oo Ugaadhsi Sharcidaro Ah Ku Sameeyay Duurjoog
September 4, 2018 - Written by Berbera Today
Berbera(Berberatoday.com)-Maxkamadda degmada Berbera ayaa waxa ay xukun ku ridday afar qof oo ka mid ah lix qof oo u xidhnaa eedo la xidhiidha ugaadhsi sharci-darro ah.
Dadkan la xidhay oo shan ka mid ahi u dhasheen dalka Pakistan iyo hal qof oo Somaliland u dhashay, ayaa maxkamaddu saddex ka mid ah ku xukuntay midkiiba 4-kun oo Dollar oo ganaax ah.
Dadkan ayaa la sheegay inay shaqaale ka ahaayeen saldhigga Imaaraadka Carabta uu ka dhisayo magaalada Berbera.
Wasaarad deegaanka Somaliland ayaa waxa ay sheegtay in dadkan la xukumay lagu qabtay ugaadhsi sharci daro ah, Kaas oo ay ugaadh sanayeen qaar ka mid ah ugaadha dalka, waxaa kale oo ay wasaaradu sheegtay in ragan lagu qabtay raqda laba ka mid ah ugaadhii ay ugaadhsanayeen oo deero ahayd iyo waliba gaadiidkii ay falkaas ku filinayeen.