“Caalamku Ma Barraarugo Illaa Xaaladdu Xumaato, Laakiin Waxaynu U Baahan Nahay Nidaam Aynu Kaga War Hayno Xoolaha, Daaqa Iyo Deegaanka..”Wasiir Sacad Cali Shire
November 24, 2016 - Written by Berbera Today
Wasiirka Arrimaha Dibadda Oo Sheegay In Somaliland Caalamka Kala Siman tahay Ka Feeginnaan La’aanta Roob la’aanta Iyo Abaaraha Halista Geliya Nolosha Dadka iyo Xoolaha
London(Berberatoday.com)-Wasiirka Wasaaradda Arrimaha Dibada Dr Sacad Cali Shire, ayaa isagoo ku sugan magaalada London wax laga weydiiyey Abaarta muddada gaaban ee 15-ka bilood ah ku soo noqotay dalka iyo qorshe la’aanta Xukuumadda, Wasiirka oo ka jawaabaya ayaa waxa uu yidhi “Runtii inay Dayrtii baaqatay, Guga roobkiisiina uu teelteel ahaa, sanadkii horrena raxmadii aynu helnay inay aad uga hooseysay tii aynu heli jirnay intaa waa la dareensanaa oo waa lala socday, hase yeeshee sida aad ka war hayso inaga oo kaliya inaguma koobna ee Caalamku sidiisaba ilaa xaaladu xumaato ma barraarugo oo ma kaco, waxase aynu u baahanahay inaynu samaysano nidaam iyo hab aynu kaga war hayno xaalada Xoolaha, Daaqa iyo Deegaanka”.